Að styrkja gengi með lánum.

 

Þeim fjölgar nú spesíalistunum sem eru hættir að sjá lógíkina í því að styrkja gegni krónunnar með því að skuldsetja ríkissjóð. Spesíalistarnir virðast farnir að átta sig á því, guði sé lof, að skuldsetning þjóðarbúsins var einmitt ástæða gengishruns íslensku krónunnar.

Það er auðvitað ekki von að spesíalistarnir hafi áttað sig á þessu, því þetta eru einmitt sömu spesíalistarnir og komu algerlega af fjöllum þegar að gegni krónunnar hrundi.

Það er sorglegt að þurfa að þola það að vera undir kviksemi þessara spesíalista kominn.

Ég held að íslendingar séu mesta hjarðsál sem ég hef kynnst og hef ég þó komið víða við. Það lögðust allir á eitt í að dásama þessa svokölluðu útrás. Þegar allt hrundi virtust allir á því að það eina sem gæti bjargað okkur væri að taka lán og það sem mest erlend lán. Ef að einhver mótmælir eða segir “bíðið við”, þá er sá sami bara kveðinn í kútinn og afgreiddur sem aumingi eða þaðan af verra.

En vonin er samt að vakna nú; vonin um að – hugsanlega allir – fari nú í þann móð að sjá að það sé alger fjarstæða að halda því fram að lán geti hjálpað okkur til að greiða fyrir lán.

- bíddu við, var það ekki einmitt það sem felldi bankana?