Miðnæturárásir - Mið-ætu-árásir

 

Ég bý í miðbænum. Um hverja helgi, oft byrjar það á fimmtudagskvöldum, þá verðum við sem búum í miðbænum fyrir árásum. Ölvaðir hálfvitar koma þá æðandi úr úthverfum borgarinnar og taka að haga sér eins og vangefnir villimenn, ælandi, öskrandi, skemmandi, meiðandi, dópandi og berjandi. Í stuttu máli sagt hagandi sér eins og þeir myndu aldrei gera í sínu hverfi, en það er allt í lagi, finnst þeim, af því að klukkan er miðnætti og staðurinn er miðbærinn.

Ég veit dæmi þess að fullorðnir einstaklingar, menn og konur í virðulegum stöðum svona dags daglega, taka upp á því við þessar aðstæður að henda bjórflöskum og míga þar sem þeim sýnist. Hvað er að þessum einstaklingum?

Ég bjó um árabil á Skindergade í Kaupmannahöfn sem er eins mikið í miðbæ þeirrar borgar og hægt er að vera og varð aldrei var við aðra eins hegðan, önnur eins ólæti og aðra eins vanvirðingu fyrir lífi, limum og eignum annarra og ég upplifi helgi eftir helgi hér í Reykjavík. Mönnum er svo gjörsamlega sama hvort einhver býr eða starfar á þeim stað þar sem menn kasta þvagi  eða henda rusli að það nær ekki nokkru tali – vanvirðingin er alger.

Þegar kreppan skall á var ég að vonast til þess að draga myndi úr drykkjuólátum í miðbæ Reykjavíkur en það virðist ekki ætla að gerast því miður, kannski að það hafi bara spítt í ef eitthvað er. Á móti kemur svo að löggæsla en nánast ósjáanleg þannig að ekki er það til að draga úr ruddaskapnum.

Já kreppan – ég skil nú hvers vegna íslendingar eru svona og svo gerilsneyddir allri virðingu fyrir náunganum og eignum hans. Við vorum að mæra þá sem voru hvað gráðugastir og siðlausastir sem hetjur vorra tíma. Vertu nógu frekur og ruddalegur, taktu ekkert tillit til annarra og þá mun þér vegna vel vinur minn sögðum við við börnin okkar og þá er að sjálfsögðu ekki að spyrja að því hvers vegna börnin okkar verða slík ungmenni sem við sjáum hér um helgar, öskrandi, ælandi, berjandi, skemmandi í gersamlega sjúku ástandi.

Ég veit það ekki en mér er það til efs að ungmenni í byrjun tuttugustu aldarinnar hefðu hagað sér eins og þessi ungmenni haga sér sem allir sjá ef að þeir bara hætta sér í miðbæinn um helgar eftir miðnættið. Mér er það einnig til efs að þessum ungmennum líði vel, svei mér þá.

Já ég er að fullyrða það að uppeldið hafi gersamlega brugðist og að það samfélag sem við höfum búið okkur til geti af sér sjúka og óhamingjusama einstaklinga sem sést best af framkomu þeirra.

Talandi um samfélag þá langar mig aðeins að minnast á sjálfa miðborgina og hvernig búið er að eyðileggja hana gersamlega. Þessir óhæfu borgarfulltrúar hafa með skipulagsmistökum, á skipulagsmistök ofan, eyðilagt hinn fallega miðbæ sem Reykjavík átti. Laugavegurinn er farinn að minna á Istedgade í Kaupmannahöfn, eins og hún var þegar hún var hvað verst; illa lyktandi barir við hvert götuhorn, tattú búllur, sex sjoppur og hótel – það er Laugavegurinn í dag. Fólk kemur ekki á Laugaveginn til að versla.

Við sem að höfum búið í miðbænum og ólumst upp við það að Laugavegurinn var aðal verslunargata Reykjavíkur munum tímana tvenna. Þá bar fólk virðingu fyrir Laugaveginum og ældi ekki þar né meig eða komst upp með það að leggja bíl sínum á gangstétt Laugavegarins – það var bara fáheyrt og óhugsandi. Þegar við, íbúarnir, ætlum svo að malda í móinn við borgarapparatið er okkur sagt að við búum í miðbænum og þar gildi ákveðnar reglur. Við höfum sem sagt samþykkt það með því að festa kaup á húsnæði í miðbæ Reykjavíkur að við getum ekki sofið á næturnar um helgar, að við megum bara byrja morgnanna á því að þrífa ælur og hland af útidyratröppunum, að bílar okkar eru rispaðir – það er bara allt hluti af því að búa í miðbænum!!!

Þessar borgarstjórnir og þetta borgarapparat hér er svo gersamlega fyrir neðan allar hellur að það er ekki hægt að koma orðum yfir það. Þegar mörg okkar settumst að í miðbænum var ekki bar á öðru hverju götuhorni og það var svo sannarlega ekki þetta stríðsástand um hverja einustu helgi – ég fullyrði það.

Í hvaða hverfi öðru myndi það líðast að atvinnustarfsemi, og það hávaða atvinnustarfsemi, myndi fara í gang um miðnættið? Er ekki eðlilegt, og tíðkast það ekki í öllum siðuðum löndum, að hávaðamengandi atvinnustarfsemi er sett í sér iðnaðarhverfi? Ég man þá tíð, þegar Reykjavík var góð borg að búa í og gamalmenni voru ekki hrædd að fara hér um göturnar á kvöldin, ég man þá tíð að þá voru skemmtistaðir staðsettir í þeim hverfum sem ekki bjó fólk. Hver man ekki eftir Hollywood, Klúbbnum, Broadway og Sigtúni? Af hverju hefur þetta breyst? Hver kaus um það að setja skemmtistaði borgarinnar í miðbæinn? Bari og veitingastaði, sem loka á skikkanlegum tíma, er eðlilegt að hafa  í miðbænum, en staði þar sem er dúndrandi tónlist, haugdrukknir kúnnar og öskrandi og ælandi vesalingar að dópa sig og búsa – staðir sem kalla á slíkt eiga að vera í iðnaðarhverfum borgarinnar, þar sem háfaði frá þeim truflar ekki sofandi fólk og lítil hætta er á að verið sé að traðka á pottablómum og snýta sér í snúruþvott. Hvað er að þessum borgarskipulagsidíótum?  

Ég hef starfað í ferðaþjónustunni og hef talað við margan ferðamanninn erlendan sem furðar sig á því ástandi sem skapast í Reykjavík um helgar; lögreglumaður í New York sagði að slík mannfjöldasamsöfnun myndi aldrei líðast þar. Enda sér maður nánast ekki lögreglu á ferð í miðborginni eftir miðnætti fram á morgun; lögreglan hættir sér ekki nema brýna nauðsyn beri til og varla það. Við á mínu heimili urðum vitni að nauðgunartilraun sem að við skiptum okkur að – lögreglan kom ekki á staðinn þrátt fyrir að ítrekað hafi verið hringt. Eitt sinn var skemmt hjá okkur grindverk og vöknuðum við við atlætin, hringt var í lögreglu sem kom hálftíma síðar og þá var gerningsmaðurinn á bak og burt en þá einungis nýfarinn, það var eins og hann vissi að hann þyrfti ekkert að flýta sér burt því lögreglan myndi ekki vera að flýta sér á staðinn eða svo upptekin að hún kæmist ekki til að sinna þessu. Við bárum svo persónulega fjárhagsskaðann sem af eyðileggingunni hlaust – en það er jú bara hluti af því að búa í miðbænum ekki satt?

 

Nei kæru Íslendingar – kæru Reykvíkingar, það þarf að athuga það hvernig fólk veður uppi með frekju og vanvirðingu gagnvart náunganum og umhverfinu. Fólk er svín sagði starfsmaður í þrifadeild borgarinnar eftir hina svokölluðu Menningarnótt. Umgengi sýnir innri mann og það þarf að ala það upp í fólki að ganga um af virðingu fyrir því að þú ert ekki einn í heiminum og drasl, æla og hland hverfur ekki af sjálfu sér heldur þarf einhver annar að þrífa það upp.

Athugasemdir

[Páll Geir Bjarnason, 23.8.2009 kl. 21:55]

Ekki það að ég sé ósammála þér, langt því frá. En ég spyr mig þó. Hvers vegna í ósköpunum býrðu ennþá við Laugaveginn?

[Sigurður Oddgeirsson, 23.8.2009 kl. 22:46]

Þvert á Skindergade liggur Kattesund og Larsbjørnsstræde, en þessar tvær götur heita í daglegu tali hér í Kaupamannahöfn: PISSERENDEN. Verður þetta ef til vill nýtt nafn á Laugaveginum?

[Þór Ludwig Stiefel TORA, 23.8.2009 kl. 23:28]

Ég bý við Laugaveginn Páll vegna þess að ég vil búa í miðbænum og á gott húsnæði sem stendur við Laugaveginn. Ég bý ENNÞÁ við Laugaveginn vegna þess að ég vil ekki gefast upp fyrir aumingjum og vesalingum sem vaða yfir allt og alla, rétt eins og ég bý ENN á Íslandi af sömu ástæðu - að flýja er ekki minn háttur, frekar vil ég berjast fyrir bættu ástandi.

Já Sigurður það má vera að þessar götur séu kallaðar hlandrennan og víst fer það nafn að eiga við Laugaveginn og nágrenni - en ég fullyrði að umgengi um Skindergade, Koebmagergade, sjálft Strikið og Pisserenden er betri en umgengni um Laugaveginn, að ekki sé talað um hversu miklu meiri umgengin er í Kaupmannahöfn en hér í Reykjavík sem gerir samanburðinn enn verri.

[Guðmundur Viðar Árnason (IP-tala skráð) 24.8.2009 kl. 11:39]

Sammála Óskari, ekki flyt ég nálægt skóla eða kirkju og fer svo að pirra mig á kirkjubjöllunum og skólabjöllum í frímínútum...

[Dexter Morgan, 24.8.2009 kl. 16:34]

Hahaha... gott á ykkur miðbæjar-rotturnar. Ef þið eruð ekki ánægð með ástandið, þá megið þið alveg koma hingað norður í land. Hér er ekki ælt og skitið á hverju götuhorni allar helgar.

Annars má líka alveg hringja í vælubílinn fyrir þig.

[Eggert Vébjörnsson (IP-tala skráð) 24.8.2009 kl. 16:43]

Sæll Þór.

Fínasta færsla hjá þér og ég skil alveg hvað þú ert að fara í þessum efnum þó svo að ég búi ekki í 101. Að telja að ástandið sé eðlilegt eða ásættanlegt eins og sumir hverjir virðast halda sbr. kommentin hjá þeim er nánast barnalegt ef ekki klárlega heimskt. Á fólk að sætta sig við það að vera svefnlaust og stíga oní æluklessur að morgni ef það býr í miðbænum??

Svona framferði og hegðun þekkist víðast hvar ekki þar sem að siðmenning og góðir siðir hafa náð að festa sig í sessi án þess þó að um einhverja skerðingu á frelsi einstaklingsins sé að ræða. 

Ég dvaldi um tíma í Nýja sjálandi og um smá tíma í Sydney í Ástralíu á leiðinni heim og þar voru reglurnar afskaplega einfaldar.

Fólki var ekki heimild að vera með áfengi á almannafæri hvort sem var að nótt eða degi.
Á veitingastöðum voru skýrar reglur um það að barþjónum var ekki heimilt að afgreiða fólk sem var áberandi illa drukkið um meira áfengi. Við því voru háar sektargreiðslur. Enda augljóst að þegar menn eru að afgreiða illa drukkna einstaklinga um áfengi þá eru þeir að notfæra sér ástand þeirra sem er ekkert annað en áfengiseitrun. Er það siðlegt og sæmandi?

Eins er opnunartími skemmtistaða vægast sagt fáránlegur. Að hafa þessa staði opna til 3 eins og var hérna áður fyrr ætti að vera yfirdrifið nóg fyrir eðlilegt skemmtanahald. Þeir einstaklingar sem eru ennþá að klukkan 5 til 6 á morgnana eru nánast orðnir vitfirrtir af svefnleysi og afengisneyslu og ekki við góðu að búast.

Svo eru löggæslu málin eins og þau eru. Skammarlegt hversu lítið fé er veitt til löggæslu mála og vil ég meina að lausnin væri sú að lögreglan fengi allt sektarfé sem innheimtis til reksturs lögreglunnar. Held að það væri þeim hvatning til að sekta fólk fyrir brot á lögreglusamþykktum etc. sem að veitti meira aðhald á óaldarlýðinn sem veður uppi.

Hvet þig og fleiri íbúa miðbæjarins til að berjast fyrir skýrum reglum um siðlegt og eðlilegt skemmtanahald og jafnframt fyrir bættri löggæslu í miðbænum.

Baráttukveðjur.

[Þór Ludwig Stiefel TORA, 25.8.2009 kl. 00:47]

Ég þakka þér Eggert fyrir innleggið enda það eina málefnalega hér.

Þú Óskar hefur ekki búið í miðbænum í 30 ár, ef svo er þá hefurðu verið ákaflega mikið barn allan tímann. Ástandið hefur versnað til mikilla muna undanfarinn einn og hálfan áratuginn. Bæði hefur stöðum fjölgað til muna, opnunartími þeirra legnst, þeir þjappast á lítinn reit í miðborginni, í stað þess að vera dreifðir um borgina áður fyrr, og amfetamín neysla og aukning á sterkum fíkniefnum hefur breytt þessu svolallaða skemmtanahaldi algerlega. Þetta er allt annað umhverfi en fyrir 30 árum og allt annað umhverfi en fyrir 15 árum og það er að versna.

Þú þarna Guðmundur virðist vera einn af þessum aumkunarverðu vesalingum sem slagar um miðbæinn í þeim eina tilgangi að saurga hann. Heldurðu virkilega að við sem kjósum að búa í miðbænum séum þar vegna þess að þar er jammað? Það er greinilega ekkert annað þar fyrir þig að sækja, sem lýsir akkúrat vandamálinu. Nei við sem búum þar erum að sækja í hið daglega mannlíf, ekki villimennskuna sem brýst fram um helgar.

Und Dexter Morgan ja, ja það er nú líka vælt mikið á landsbyggðinni er það ekki?

[Guðmundur Viðar Árnason (IP-tala skráð) 25.8.2009 kl. 10:57]

Já sæll !! af því ég kommentaði á bloggið þitt sem er btw væl eins og Óskar bendir á, þá er ég "aumkunaverður vesalingur sem slagar um miðbæinn í þeim eina tilgangi að saurga hann"

Ég var ekki með neitt skítkast hérna, er ábyrgur foreldri sem býr í Vesturbænum og ef ég kýs að sækja í hið daglega mannlíf þá labba ég einfaldlega niður í bæ, tekur 7 - 8 min og svo labba ég heim aftur. Enginn að segja að ég þurfi að búa þar, sérstaklega ef ég sætti mig ekki við allt sem honum fylgir ölvun, læti, umferð, strætó ofl ...

Ég kommentaði vegna þess að það er alltof mikið um það að fólk í 101 er að pirra sig yfir hlutum sem það átti að sjá fyrir!! En svo þegar að það upplifir þetta loksins sjálft þá þarf allt að fara til andskotans, tonlistin of hávær, mikil slagsmál, ölvun og ælur og jari jari jari... ÞETTA ER VITAÐ MÁL og kommon sens, sem er greinilega ekki það kommon :)

[Eggert Vébjörnsson (IP-tala skráð) 25.8.2009 kl. 11:26]

Það er líka kommon sens Guðmundur Viðar að fólk sér ekki allt fyrir frekar en spákellingin varðandi jarðskjálftana.

Sáu allir fyrir mikla fjölgun veitingastaða í miðbænum og þessutan lengdan opnunartíma?
Sáu allir fyrir stóraukna neyslu allskonar vímugjafa og vímuefna?
Þarf fólk að leita til spákonu eða einhvers ráðgjafa uppá þá þróun sem að kemur til með að eiga sér stað í hverfinu þar sem maður hyggst kaupa húsnæði??

Þetta er þvílíkt endemis kjaftæði í þér að mér er skapi næst að halda að þú getir engan vegin verið ábyrgur foreldri því ábyrgir hugsandi einstaklingar mæla ekki svona framferði bót og kalla það væl í öðrum ef þeir fara fram á eðlilegar úrbætur í þeim efnum.

Ég hef t.a.m. verið á rölti í miðbænum um miðjan dag þar sem bekkirnir við Austurstræti eru undirlagðir af drykkjufólki. Hef horft uppá það æla og míga á almannafæri og túristar og barnafólk horfði furðulostið á!!!
Er það eðlilegt að þetta eigi að líðast t.a.m. því þetta er bara hin hliðin á stjórnleysinu og siðleysinu sem tekur við um nætur frá fimmtudegi fram á sunnudag eins og Þór kemur inná.

Þetta þykir víðast hvar langt í frá að vera eðlilegt og eins og ég minntist á þá þykir svona villimennska og viðbjóður ekki við hæfi í Nýja Sjálandi og Ástralíu og örugglega mun víðar.

Enda tæpast hægt að tengja svona hegðun eins og Þór lýsir við eðlilegt og "heilbrigt" skemmtanahald.

[Guðmundur Viðar Árnason (IP-tala skráð) 25.8.2009 kl. 12:23]

Það var engnn að segja að ástandið í miðbænum um helgar sé í lagi, þú veist það sjálfur Eggert.

Jú að sjálfsögu er ekkert huggulegt að labba með börnin sín gegnum fógetagarðinn á sumrin og horfa uppá liðið þar veltast um í annarlegu ástandi en svona er miðbærinn, þetta er það sem fylgir honum og hefur alltaf gert !

Ég seldi DV og Pressuna í miðbænum fyrir 20 árum bæði um helgar og á virkum og þá voru rónar á kreiki um miðjan dag með læti og slagsmál, sama ælan á götuhorni óþrifinn nokkra daga í röð og annað í þeim dúr.

Það sem ég á að við er að þetta er ekkert að fara breytast, meiri löggæsla fær fólk ekki til að pissa eða æla annarstaðar en í bakgarðinum hjá Þór eða opnunartímanum breytt til kl: 3 þá pissa bara fleiri á sama tíma :)

Fleiri klóssett í bænum bjarga þessu reyndar...

Mér gæti ekki verið meira sama hvernig þetta er hinum megin á hnettinum, svona er þetta hér í dag og flestir vita það þess vegna finnst mér alltaf svolítið fyndið að fólk sem flytur í 101 furðar sig svo mikið á þessu, þetta er svona hvort sem fólki líkar það eða ekki og þetta er líklega ekkert að fara breytast því miður.

[Eggert Vébjörnsson (IP-tala skráð) 25.8.2009 kl. 15:26]

Gott og vel Guðmundur

Ef ástandið er ekki í lagi þá er tímabært að lagfæra það.
Þannig berum við okkur að heima við ef eitthvað er bilað eða ekki eins og það ætti að vera. Þá lögum við hlutina eða gerum nauðsynlegar úrbætur þannig að við séum sáttir.

Að líta á ástandið í miðbænum sem eitthvað óumbreytanlegt ástand sem hafi alltaf verið svona og komi alltaf til með að vera svona er blindgata hugans ágæti Guðmundur. Við getum nefnilega dregið lærdóm af því sem að vel er gert annars staðar sbr. þá staði sem að ég nefndi og/eða reynt að forðast að gera sömu mistökin og aðrir.

Og heldur þú ekki að það væri ánægjulegt fyrir þig að geta spásserað í miðbænum án þess að þurfa að taka fyrir augun á börnunum þínum eða sneiða framhjá fólki í einhverju miður annarlegu ástandi.

[Þór Ludwig Stiefel TORA, 25.8.2009 kl. 19:10]

Það er alveg merkilegt hvað umræða á bloggsíðum þarf oft að fara að snúast um orðhengilshátt kæri Guðmundur. Þú segir að ástandið í miðbænum sé ekki í lagi og ert þar með sammála mér og Eggert, og fjölda annarra aðila, sem búa í miðbænum sem og annarsstaðar - samt þarft þú að vera með múður og kalla orð mín væl og leggur einhvern skilning í sem ekki er og færð eitthvað alrangt út.

Ég er EKKI ný fluttur í miðbæinn. Ég flutti á Laufásveginn níu ára gamall og hef búið nær óslitið í miðbænum síðan, fyrir utan það að hafa búið nokkur ár í vesturbæ Reykjavíkur og átta ár í Kaupmannahöfn; samtals eru þetta farin að verða all mörg ár í miðbænum kallinn minn.

Þú fullyrðir: "þetta er svona hvort sem fólki líkar það eða ekki og þetta er líklega ekkert að fara breytast því miður." Hvers konar málflutningur er þetta eiginlega? Á maður bara að sætta sig við vont ástand af því að það er, en reyna ekki einu sinni að gera neitt í málunum? - hvílíkur aumingja hugsunarháttur og Icesave slepja!!! Þú ert einnig að reyna að halda því fram að svona hafi þetta alltaf verið - NEI, þetta (fáránlega stríðsástand) hefur ekki alltaf verið svona heldur hefur verið að breytast í þessa átt undanfarna áratugi og fyrir því eru margar ástæður sem ég og Eggert höfum farið yfir, en þú hreinlega virðist ekki vilja sjá það. Ég ætla samt, sérstaklega fyrir aðra lesendur, að fara yfir málið.

1. Skemmtistöðum hefur fjölgað til mikilla muna; tökum lítinn reit í kringum Austurstræti sem dæmi. Þar sem nú er íslenski barinn var áður Gallerí Borg, þar sem nú er Apótekið var lyfjaverslun Háskólans, þar sem nú er Kaffi París var fataverslunin París, þar sem nú er sport bar við hlið Óðals var fataverslunin London, þar sem nú er Thorvaldsen bar var Torgið stórverslun og gegnt henni var ein fallegasta vefnaðarvöruverslun bæjarins en þar er nú bar. Þetta er sirka 500 fermetra reitur.

Því miður er þetta langt í frá einsdæmi og hægt er að fara í gegnum megnið að miðbænum og segja svipaða sögu.

Og þú Guðmundur vertu þá ekki að reyna að halda þessu kjaftæði fram að svona hafi þetta alltaf verið og verði alltaf [sic].

2. Skemmtistaðir eru nú mun samþjappaðri í borgarmyndinni en áður, sem veldur meira álagi á þeim stað sem skemmtistaðasamþjöppunin hefur orðið. Ég taldi upp Hollywood sem var í Ármúlanum, Broadway sem var í Mjódd, Klúbbinn sem var í Borgartúninu og Sigtún sem var í Sigtúninu.

3. Lenging opnunartíma. Þegar talað var um að lengja opnunartíma skemmtistaða var það meginmarkmið að dreifa því þegar fólk hópaðist út á göturnar eftir lokun staðanna. Þetta hefur ekki orðið vegna þess að staðir loka enn nánast allir á sama tíma, einungis 6 að morgni nú í stað 3 áður. Þetta veldur eðlilega allt annarri og meiri truflun fyrir þá sem búa í miðbænum.

4. Það þarf ekki annað en að tala við SÁÁ til að skilja að neyslumynstur íslendinga hefur breyst til mikilla muna undanfarið, sérstaklega undanfarna tvo áratugi. Harðari efni eru nú mun algengari en áður, sérstaklega amfetamín sem gerir þá sem þess neyta árásargjarna og óútreiknanlega, fyrir utan það að drykkja varir mun lengur þegar amfetamíns er neytt. Þetta er svo samfara því að mun yngri neytendur eru að þessum hörðu efnum en áður var og eru það ungmenni sem oftast valda hvað mestum hávaða og skaða (gaman er að geta þess hér að borgaryfirvöld í Mílanó hafa tekið upp það ráð að sekta foreldra drukkinna ungmenna og mæli ég með því að slíkt verði tekið upp hér).

5. Fjölgun borgarbúa, íslendinga og ferðamanna. Það segir sig sjálft að fjölgun fólks veldur auknu álagi og það þarf að bregðast við því sem ekki hefur verið gert hér.

6. Laugavegurinn var aðal verslunargata Reykjavíkur og þar með Íslands en er það ekki lengur. Í dag viðgengst hegðan við Laugaveginn sem aldrei hefði viðgengist þegar Laugavegurinn var aðal verslunargatan. Hugsið ykkur það að þegar drukkinn einstaklingur sést í Kringlunni þá er þeim einstakling umsvifalaust vísað út úr Kringlunni. Þannig var það einnig þegar Laugavegurinn var og hét. Nú, aftur á móti, getur maður átt von á því að fyllibyttur (viðskiptavinir) sem eru að fá sér smók fyrir utan einn þessara fjölmörgu barbúlla sem nú eru á Laugaveginum í stað verslana áður, garga að manni leiðinda athugasemdir og það um hábjartan daginn, eitthvað sem var óhugsandi fyrir ekki svo mörgum árum síðan.

Nei ásýnd Laugavegarins og miðbæjarins alls hefur gerbreyst undanfarna tvo áratugi og það til hins verra og það er ekki bara eitthvert væl í mér. Mér þykir vænt um miðbæinn og vil fallegan miðbæ sem allir geta notið á öllum tímum ekki bara hávaðasamar fyllibyttur. Þess vegna vil ég gera eitthvað í þessu varðandi offjölgun skemmtistaða en ekki bara leggja niður skottið og flýja í úthverfin eins og sumir eru að leggja til hér.